وصيــــــة أب

بقلم الشاعر

جمال المناخلى


قولي لإبني اللي إتولد في غربتي
الإغتراب ماكنش هوه سكتي
والسكة واعرة عفرت علي ضحكتي
والضحكة تصفا
لما اشوفه
يبحلق في خلقتي
——-
قولي لإبني إن أول خطوته
خطوة ووقعة
خطوة وسندة
خطوة وعزم
ما يتوه بعدها عن سكته
——-
قولي لإبني إن أول كلمته
لازم تكون لأ
لكل ظالم
لكل طامع
لكل حاكم
قام وقال أنا ولي نعمته
——–
قولي لإبني
إن عصر المعجزات ولي وفات
وبإيده ياكل لقمته
وبكلمة ترجع عزته
ومحدش من الكلام مات
كتير  وماتوا من السكات

14,278 عدد المشاهدات